Month: March 2019

G E M E E N S K A P S N U U S
D I N S D A G   1 2  M A A R T   2 0 1 9

W E R K V E R S K A F F I N G
D I N S D A G   1 2   M A A R T  2 0 1 9

Die Werkverskaffingsbulletin word elke Dinsdag om 10h40 uitgesaai op 104fm.

Poste moet asseblief teen Maandae 11:00 gestuur word na reception@104fm.co.za

12 MAART 2019

Lukas 12:24: #Voorsiening

“Kyk na die kraaie, want hulle saai nie en hulle maai nie, hulle het geen voorraadkamer of skuur nie, en tog voed God hulle. Hoeveel meer is julle nie werd as die voëls nie!”

Die hoof opskrif van hierdie skrifgedeelte verwys na die sorge van die lewe. Die sorge van die lewe veroorsaak baie groot bekommernisse by baie mense. Die kwellinge van die lewe het baie mense al in ‘n diep put van depressie laat beland. Daarom sê Jesus kwel julle nie oor die lewe wat julle gaan eet, of drink of gaan aantrek nie. Lukas 12:23 sê: “Die lewe is meer werd as die voedsel en die liggaam as die klere.” Filippense 4:6 verklaar: “Wees oor niks besorg nie, maar laat julle begeertes in alles deur gebed en smekinge met danksegging bekend word by God.” Daarom is dit belangrik om op die Here te vertrou, want Hy is Jehova Jirha, die God wat voorsien. Ons dien die God van die onmoontlike.

Terwyl die manne moeg was en die hele nag deur niks gevang het nie, toe kom Jesus en sê: “Vaar uit na die diep waters en laat julle nette sak aan die regterkant. Alhoewel hulle vangste niks opgelewer het nie en hulle die see ken, het Petrus geantwoord: “Op U woord, Here sal ons dit doen.” Wanneer daar niks in die pot is nie verklaar Habakuk 3:17 “…..die drag van die olyfboom sal teleurstel en die saailande geen voedsel oplewer nie….” Vers 18 sê dan: “Nogtans sal ek jubel in die Here, ek sal juig in die God van my heil.” Want dit is net Hy wat kan voorsien in my behoeftes”.

Die woord bemoedig ons as die kraaie nie saai en maai en geen voorraadkamer of skuur het nie en tog voed die Here hulle. Die vraag is, is ons nie meer werd as die kraaie nie? Jesaja 43:4 sê: “Omdat jy kostelik is in My oë, en hoog geag is , en Ek jou liefhet, het Ek mense in jou plek gegee.”

Vrede / Shalom.

11 MAART 2019

2 Korintiërs 9.8: #Voorsiening

“En God het mag om alle genade oorvloedig oor julle te laat wees, sodat julle altyd in alle opsigte volop kan hê en oorvloedig kan wees tot elke goeie werk.”

Groot en Almagtig is ons God wat magtig is om in elke behoefte van ons te voorsien. Spreuke 11:24 verklaar: “Daar is een wat ruim uitdeel en nog meer kry, en een wat terug hou meer as wat reg is, maar tot sy gebrek.” Die Bybel se beginsel is: Wat jy saai sal jy maai, gee en vir jou sal gegee word. Dit is belangrik om alles vir die Here te gee, sodat Hy dit kan seën. Dit sien ons in Matteus hoofstuk 14 met die eerste vermeerdering van die brode. Jesus vra wat het julle? Maar hulle antwoord Hom: “Ons het hier net vyf brode en twee vissies.“ Vir die mens is dit ‘n onbesonne taak, want hoe kan ‘n mens van vyf brode en twee vissies omtrent vyf duisend manne, buiten die kinders en vroue, voed?

In Matteus 14:18-19 gebeur iets wat volgens die wetenskaplikes onverklaarbaar is: “En Hy sê: Bring dit hier vir My. Toe gee Hy die skare bevel om op die gras te gaan sit, en Hy neem die vyf brode en twee vissies, kyk op na die hemel en dank; en nadat Hy die brode gebreek het, gee Hy dit aan die dissipels en die dissipels aan die skare.”

Daar is ‘n lied wat sê: “Little become much when you place it in the Master’s hand.” Vers 20 verklaar: “En almal het geëet en versadig geword.’ God bevestig net weer dat Hy is ‘n waarmaker van Sy woord: “Wie spaarsaamlik saai, sal ook spaarsaamlik maai, en wie volop saai, sal volop maai.”

Vrede / Shalom

8 MAART 2019

Psalm 28:7:  #Blydskap

“Die Here is my sterkte en my skuld; op Hom het my hart vertrou, en ek is gehelp; daarom jubel my hart en sal ek Hom loof met my gesang.”

Psalm 28 staan ook bekend as die Dankpsalm. Dit is in hierdie Psalm wat Dawid sterk uitroep na God. ‘n Gebed om verlossing om vry te kom van die dinge rondom hom. In die Psalm hoor ‘n mens hulpkrete van ernstige uitroepe dat God moet ingryp en sy pleidooi is in vers twee: “Hoor die stem van my smekinge as ek U aanroep om hulp, as ek my hande ophef na die binneste van U Heiligdom.” Die word van die Here sê ook: Roep My aan in die dag van benoudheid. Ek sal jou uithelp, maar jy moet My eer, en dit is presies wat Dawid gedoen het.

So baie keer vergeet ons om net terug te kom om dankie te sê, om God te eer en Hom in erkentenis te neem. In vers ses begin Dawid God te loof en te prys, want hier alreeds erken hy dat God het sy pleidooi gehoor en sy gebed geantwoord het. Wanneer daar ‘n positiewe omwenteling in ‘n mens se lewe plaasvind, dan gee dit jou rede om God te verheerlik, want dit is net Sy genade en liefde wat dit kan doen.

Dawid sê sy hart jubel en juig. Hy wil sing, tot eer van die Here, ‘n gesang want die Here is sy sterkte en sy skild. In Hom, die God van die hemele en aarde is sy vertroue. God het die weeklaag en swaarmoedigheid omskep in blydskap en heerlikheid, daarom kan hy nie stilbly nie. Hy moet praat van die goedheid van die Here. Volkome blydskap laat jou verby die verskille kyk wat soms tussen mense verkeer.

Mag die Here ons help dat ons blydskap volkome sal wees en dat ons vriendelikheid aan alle mense bekend word.

Vrede /Shalom

Jesaja 35:10: #Blydskap

7 Maart 2019

“En die losgekooptes van die Here sal teruggaan en na Sion kom met gejubel en ewige vreugde sal op hulle hoof wees; vreugde en blydskap sal hulle verkry, maar kommer en gesug vlug weg.”

Telke maal, wanneer Israel ongehoorsaam was, dan het God Sy volk gedissiplineer en dan het Hy ‘n nasie gebruik om teen Israel te veg en hul soms te oorweldig om hulle as gevangenes weg te voer. Hulle was somtyds so hardkoppig dat God hulle vir ‘n tyd in ballingskap laat gaan het. En tog, omdat God ‘n behae het in Sy volk wat Hy uit verkies het, stuur Hy weer profete om hulle te bemoedig, om nie moed te verloor nie te midde van hulle omstandighede.

Jesaja hoofstuk 35 spreek van die grootheid en heerlikheid van die regering van die Messias. Daarom sê Jesaja 35:3 “Versterk die slap hande en maak die struikelende knieë vas.” Vers 4 verklaar: “Sê aan die wat vervaard is van hart: wees sterk, wees nie bevrees nie! Kyk, julle God kom met wraak met goddelike vergelding: Hy self sal kom en julle verlos.”

Die Engelse koordigter sê: ”What a day of rejoicing it will be; when we all see Jesus…” Wat ‘n heerlike dag sal dit nie wees nie, wanneer ons los en vrygemaak is van die kettings waarmee die vyand ons gebind het nie. Jesaja 35:10 sê: “En die losgekooptes van die Here sal teruggaan en na Sion kom met gejubel, en ewige vreugde sal op hulle hoof wees; vreugde en blydskap sal hulle verkry.” God self sal kom om hulle los te maak van al die bindinge waarmee die mens gebind is want dit demp die blydskap. Daarom sê Jesaja 35: 6 “Dan sal die lamme spring soos ‘n takbok en die tong van die stomme sal jubel….” Want die blydskap in die Here laat wonders geskied.

Vrede / Shalom.

Psalm 27: 6: #Blydskap

6 MAART 2019

“Nou sal my kop hoog opgelig wees bo my vyande rondom my en daarom sal ek in Sy tent offers offer met uitroepe van vreugde.  Ek sal sing en musiek maak tot eer van die Here.”

Wanneer Dawid die woorde uitroep: “En nou sal my hoof hoog wees bo my vyande rondom my….” spreek hy van sy omstandighede waardeur hy gegaan het. In vers vyf verklaar hy: “Al word ‘n laer teen my opgeslaan, my hart sal nie vrees nie; al staan ‘n oorlog teen my op, nogtans vertrou ek.”

Al die eer en die lof kom die Here toe, want al die vyande wat teen hom was staan beskaam. Baie keer besef ons, ons moes al gesterf het, bande van die dood het ons omring. Dawid sê strome van onheil het hom oorval maar toe hy die Here aanroep het Hy hom gehelp en uit die benoudhede gered.

Die blydskap van die Here is ons beskutting. Filippense 4:4 verklaar: “Verbly julle in die Here, ek herhaal, verbly julle in die Here.” Blydskap maak dat ‘n mens uitbundig raak van dankbaarheid. Dawid sê hy wil in sy tent offerande offer met trompetgeklank….” Laat mense hoor van die oorwinning, laat mense hoor watter magtige dade onse Here gedoen het. Wanneer ons ons verbly in die Here, dan verheerlik ons Sy heilige Naam. Psalm 37:4 sê so mooi: “En verlustig jou in die Here, dan sal Hy jou gee die begeertes van jou hart.” Hierdeur sal jy op Hom vertrou met jou hele hart en met jou hele siel.

Vrede / Shalom

G E M E E N S K A P S N U U S
D I N S D A G   0 5  M A A R T   2 0 1 9

W E R K V E R S K A F F I N G
D I N S D A G   0 5   M A A R T  2 0 1 9

Die Werkverskaffingsbulletin word elke Dinsdag om 10h40 uitgesaai op 104fm.

Poste moet asseblief teen Maandae 11:00 gestuur word na reception@104fm.co.za

Jesaja 12:5-6: #Blydskap

5 MAART 2019

“Psalmsing tot eer van die Here, want Hy het heerlike dinge gedoen; laat dit bekend wees op die hele aarde. Juig en jubel, o inwoners van Sion! Want die Heilige van Israel is groot in julle midde.”

Wanneer die Here groot dinge vir ons gedoen het, dan vul Hy ons mond met ‘n nuwe lied, sodat ons Sy lof en eer kan besing. Dawid vra wat sal ek die Here vergelde vir al die weldade! Daarom in Psalm 103:2 sê hy: “Loof die Here, o my siel, en vergeet geeneen van Sy weldade nie.”

God is groot en almagtig wat ons sterk maak vir enige uitdaging wat ons kant mag langs kom, want Hy is ons Rots en ons Bergvesting. In Hom sal ons altyd veilig wees. Hier in hulle ballingskap belowe God dat hulle bevryding gaan ervaar. Die loflied van die verlostes sal weerklink wanneer die verlossing plaasvind en die oorblyfsels, hulle wat die Here bewaar het, terugkeer.

In die derde vers word van beeldspraak gebruik waar die volk hul blydskap sal put uit die verlossing wat God bied. Wanneer daardie kragtige verlossing plaasvind, dan sal al die mense uitbreek in gejubel, mense sal dans want groot dinge het die Here vir hulle gedoen. Psalm 126:1-2 verklaar: “Toe die Here die lot van Sion verander het, toe is ons soos die wat droom, toe is ons mond gevul met gelag en ons tong met gejubel; toe het hulle onder die heidene gesê die Here het groot dinge aan hierdie mense gedoen.”

Vrede / Shalom