Month: February 2020

Begeer die goeie dinge

“Mag Hy gee wat u hart begeer en al u voornemens laat geluk” (Psalm 20:5)

In Psalm 20 het ons te doen met die ander kant van begeer. In die Tien Gebooie sê God dat dit verkeerd is om die slegte dinge in die lewe te begeer. Dawid vra vir God in hierdie Psalm om vir hom die goeie dinge te gee. Hy begeer dus om die mooi dinge van God te kry.

Wanneer ons kinders van God is, mag ons die mooi en die goeie dinge begeer. En ons mag dit van die Here vra. Op sy tyd sal Hy die daardie dinge gee wat ons begeer – as dit sy wil is. Want die Here weet wat vir ons die beste is. Hy weet beter as onsself wat vir ons die beste is.

Ons mag maar mooi en goeie dinge begeer en dit vir God vra. Die beste ding om te begeer is dat God altyd naby ons sal wees. En dat Hy ons sal lei, sal beskerm en sal versorg. En dat ons dan vir Hom sal liefhê en dien.

Here, help my om die regte dinge in die lewe te begeer. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Die Here leer ons

“Die Woord van die Here is volmaak: dit gee lewe” (Psalm 19:8)

Psalm 19 vertel vir ons hoe groot en almagtig die Here is. Die hele skepping van God verkondig sy grootheid. Die son en die maan, die sterre, alles vertel hoe groot God is. Al kan ons dit nie hoor nie, vertel die een dag dit vir die volgende dag: God is groot en baie goed!

Ons hoef maar net rondom ons te kyk, na al die groot en die klein dingetjies wat die Here gemaak het, ons hoef maar net te dink aan al die wonderlike dinge wat die Here elke dag laat gebeur, dan weet ons: God is groot en baie goed. Om dit raak te sien, is wysheid.

Maar in die Here se Woord leer ons dit die heel beste, nog beter as in die natuur of in die dinge wat elke dag gebeur. Daar leer God self vir ons, daar leer ons van God self. Vers 8 sê dat die Here se Woord volmaak is, want daar ontmoet ons God self, leer Hyself vir ons. Die lesse wat die Here ons leer, is betroubaar en waar.

As ons elke dag vir God ons leermeester maak, sal ons gelukkig wees en kennis van sy Woord opdoen.

Here, dankie vir ’n Leermeester soos U. Leer my om die regte pad te loop. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

A L L E S   E N   N O G   W A T

S A T E R D A G   2 2   F E B R U A R I E   2 0 2 0

K E R K N U U S
S O N D A G   2 3   F E B R U A R I E   2 0 2 0

God het jou lief

“Hy het my in vryheid laat uitgaan, my gered omdat Hy my liefhet” (Psalm 18:20)

Die Here was baie lief vir Dawid. Dawid het hierdie Psalm geskryf nadat die Here hom van sy vyande verlos het. In Dawid se lewe het hy baie vyande gehad wat hom wou doodmaak. Maar omdat Dawid ’n kind van die Here was en op God vertrou het, was die Here vir hom goed en baie lief. In die Bybel lees ons dat Dawid ’n man na God se hart was.

Vandag word ons lewens ook in gevaar gestel deur mense wat ons kwaad wil aandoen. Al waarop ons kan vertrou, is God. Hy het ons lief en sal ons altyd beskerm. Hy is ons Vader in die hemel en weet wat ons nodig het.

My Vader, baie dankie dat U my as u kind aangeneem het. Dankie dat U my so oneindig liefhet. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Geen afgode nie

“Die afgode in die land, so aantreklik vir baie – met hulle wil ek niks te doen hê nie”

(Psalm 16:3)

Psalm 16 is ’n baie mooi gedig van Dawid. Daarin vertel hy van die baie mense wat afgo­de dien. Met sulke afgode wil hy niks te doen hê nie. Hy wil selfs nie eers oor afgode praat nie, nog minder wil hy vir hulle offers bring. Want afgode is nikswerd dinge.

Ook in ons sondige wêreld van vandag is daar baie afgode wat vir ons aantreklik lyk. Afgode is alles wat ons in God se plek stel. Alles wat ons aanbid.

In plaas van afgode te dien, moet ons liewer soos Dawid ontdek dat dit veel beter is om by God alleen te skuil, en Hom alleen te dien. Want wie by die Here skuil, ontvang oorvloedige blydskap en net wat mooi is. Want die Here sorg vir ons. Hy gee vir ons die lewe self.

Here Jesus, bewaar my van alle kwaad. Laat U Heilige Gees my die regte pad wys om te loop. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

God se wil

“Here, leer my tog wat reg is, en help my om U wil te doen” (Psalm 5:9)

Wanneer ons Psalm 5 lees, kom ons agter dat die skrywer, Dawid, na God roep om hulp. Hy sê dat daar baie mense is wat verkeerde dinge doen. Hy prys God omdat God hom genadig is. God is ’n God van liefde wat die regverdiges beskerm. In vers 9 vra Dawid dat God hom moet help om sy wil te doen.

In ons lewe moet ons elke dag besluite of keuses maak. Soms wil ons dinge op ons eie manier doen, dan werk dit nie uit nie. Wanneer ons weer keuses of besluite moet maak, moet ons eers vir God vra wat sy wil is. God weet wat die beste vir ons sal wees. As ons dan doen wat God se wil is, sal Hy saam met ons stap en in die toekoms vir ons sorg.

Help my Here, om u wil te doen. Leer my om elke dag naby aan U te leef. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

W E R K V E R S K A F F I N G
D I N S D A G   1 8   F E B R U A R I E   2 0 2 0

Die Werkverskaffingsbulletin word elke Dinsdag om 10h40 uitgesaai op 104fm.

 Poste moet asseblief teen Maandae 11:00 gestuur word na reception@104fm.co.za.

G E M E E N S K A P S N U U S
D I N S D A G   1 8   F E B R U A R I E   2 0 2 0

Die Here doen wonders

“Besef tog dat die Here wonders gedoen het vir dié wat aan Hom getrou is” (Psalm 4:4)

In hierdie Psalm roep Dawid ook na God. Hy is bekommerd oor die mense wat hom kwaad wil aandoen. Hy praat van mense wat vals is en leuens vertel.

Later skryf hy dat hy op die Here sal vertrou en dat hy dan veilig sal woon. Dawid weet dat God wonders kan doen as ’n mens na Hom roep en Hom vertrou. In die Bybel is daar baie geskryf oor die wonders van God. Ons menslike verstand is te klein om regtig te kan verstaan hoe groot God is, en hoe groot die wonders is wat Hy kan doen.

Ons kan maar in God glo en op Hom vertrou. Hy kan groot dinge laat gebeur, in sy kinders se lewens, maar ook oral in die wêreld .

Here, vergewe my as ek so baie kere nie glo dat U groot wonders kan doen nie. Help my om altyd op U te kan vertrou. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.