Month: June 2019

K E R K N U U S
S O N D A G   1 6  J U N I E   2 0 1 9

A L L E S   E N   N O G   W A T

S A T E R D A G   1 5  J U N I E     2 0 1 9

2 KRONIEKE 20: 15B:  #Oorlog

14 Junie 2019_RVR

“… Wees nie bevrees of verskrik vanweë hierdie groot menigte nie, want die stryd is nie julle saak nie, maar die saak van God.” (1933/53-vertaling)

Ons staan aan die einde van ‘n week met #Oorlog as tema en het geleer om die volle wapenrusting aan te trek en te besef ons , as Christene, is daagliks in ‘n oorlog.

Wat as jy jou grootste vyand is? Hoe gemaak as die #oorlog daagliks binne jou woed? Daardie negatiewe gedagtes, wanneer jy eenvoudig nie uit die bed kan of wil klim nie, wanneer die spieël in jou huis Vyand Nommer 2 is, wanneer jy voel jy nie slim, mooi of goed genoeg is nie? Wanneer jy jou namens jou kinders vir jouself, jou huis en jou omstandighede skaam en negatiewe gedagtes lankal in jou huis en hart kom woon het? Hoe bly jy staande as die vyand en vriend dieselfde persoon is?

Daar is verskeie selfhelpboeke, ondersteuningsgroepe en kerke wat jou gaan help om hierdie innerlike vyand te veg. Soms is jy alleen en kort net praktiese raad om jou ‘n hupstoot te gee wanneer die wolke om jou saampak.

Vir daardie dae wat jy dalk effens teneurgedruk voel, wil ek jou uitnooi om die volgende sewe dinge vir die volgende sewe dae te doen. Doen dit ELKE dag, ongeag hoe mismoedig jy voel. Skryf dit neer en merk dit af! Vier elke klein suskse – ongeag hoe klein.

• Dag 1: Staan op, maak jou bed op. Moenie weer terug klim nie.
• Dag 2: Dag 1 + Was jou gesig, borsel jou tande en kam jou hare.
• Dag 3: Dag 1- 2 + Trek jouself netjies aan. Kouse en skoene ook. Los jou pajamas of kamerjas en pantoffels in die kas. Dames, sit grimering aan.
• Dag 4: Dag 1 – 3 + Was jou skottelgoed, droog dit af EN pak dit weg.
• Dag 5: Dag 1 – 4 + Kry vars lug! Maak jou vensters oop en kom uit jou huis. Al staan jy net buite vir 5 minute.
• Dag 6: Dag 1 – 5 + Lag, sing of dans! Begin net. Doen dit vir 60 sekondes. Hardop. Dit voel dalk belaglik, maar sal jou laat beter voel.
• Dag 7: Dag 1 – 6 + Worship. Kry geestelike musiek of skakel op Radio Tygerberg 104FM in en laat toe dat die Here deur lofprysing met jou herstel begin.

Verklaar vandag #Oorlog teen negatiewe gedagtes, die spoke van jou verlede, bitterheid en jou lyf. Gee vandag die eerste tree en gee jou drama vir die Groot Bevelvoerder. Hy het reeds oorwin.

Alles wat mooi is

Groetnis

HIERDIE LIED INSPIREER MY

DEUTERONOMIUM 28:7  #Oorlog

13 Junie 201913

“Die Here sal maak dat jou vyande wat teen jou opstaan, voor jou verslaan word; op een pad sal hulle teen jou uittrek en op sewe paaie voor jou uitvlug.” (1933/53-vertaling) 

Ek het onlangs die voorreg gehad om by die sewende Rut-Vrouekonferensie betrokke te kon wees. Die tema deur konferensiekunstenaar Riette Delport was Vandag kies ek vreugde. Daarin is verskeie geheime opgesluit van hoe om ‘n geestelike oorlog strategies te voer:

Vandag: Die stryd is daagliks. Maak dus elke dag seker jy is voorbereid. Trek jou wapenrusting aan. Lees jou Bybel. Bid elke dag.

Kies: Ja, dis ‘n keuse om vreugde te ervaar. En dis JOU keuse hoe jy die dag gaan aanpak. Jy kan nie altyd jou familie, werk, huislike omstandighede, finansies en gesondheid kies nie. Maar jou gesindheid is 100% binne jou beheer.

Ek. Net jy kan die keuse maak. Jou vreugde word dalk deur omstandighede beinvloed maar net jy bepaal jou reaksie daarop.

Vreugde: Vreugde is die een emosie wat ‘n oorlog eerste kom steel. Verlore vreugde maak plek vir angs, bitterheid, vrees, depressie om net ‘n paar te noem.

Tydens die konferensie is verhale van hoop en oorwinning gedeel. Dit was duidelik dat die mense wat oorwin het, die was wat bereid was om te veg vir hulle vreugde. Om hierdie geveg te wen moet jy jou fokus op die Here hou – ongeag wat rondom jou gebeur want Hy het die oorlog reeds oorwin. Fokus daarop en vind jou vreugde in Hom.

Alles wat mooi is!

Groetnis

Hierdie lied inspireer my.

Kunswerk met vergunning deur Rut Art.

LUKAS 10:19:  #Oorlog

12 Junie 2019

“Kyk, Ek gee vir julle die mag om op slange en skerpioene te trap, en oor al die krag van die vyand; en niks sal julle ooit skade doen nie.” (1933/53-vertaling) 

In die tyd wat ek hierdie rubriek skryf klop my hart warm vir twee mense in Suid-Afrika: Monet van Deventer en Nkosikho Mbele. Op Donderdag 30 Mei was daar ‘n storie op FaceBook van ‘n jong vrou wat haar dankbaarheid uitgespreek het en ‘n petroljoggie bedank het vir R100 van sy eie geld wat hy gebruik het om petrol in haar motor te gooi. Hy was bekommerd dat sy op die N2 sou gaan staan sonder brandstof. Sy het hom nie gevra nie. Hy het aangebied, eintlik aangedring.

Sedertdien is daar meer as R500 000 reeds ingesamel nadat Monet besluit het om fondse vir Nksikho te in.

Dis vir my wonderlik en vreesaanjaend. Wonderlik dat ons in ‘n tyd waar ons bang is vir die nuus ‘n juweel soos Nkosikho kan ontdek. Vreesaanjaend dat dit sulke groot nuus is!

Wat het van ons geword dat om ons naaste – in ‘n Christelike land– te help voorbladnuus is? Ons Groot Handboek, die Bybel maak dit tog duidelik in Lukas 10:27. Die eerste en grootste gebod is om die Here ons God lief te hê met ons hele hart, krag en verstand EN dan ons naaste soos onsself. Net dit. Eenvoudig.

Ons het ongelukkig ‘n bang nasie geword. Bang om werk toe te ry. Bang om huis toe te ry. Bang om winkel toe te gaan, te draf, uit te gaan en meer as alles om langs die pad te gaan staan.

Nkosikho het gesê hy is ‘n gelowige. Wat hy gedoen het, was reg. Ek dank die Here dat hy R100 gehad het om te gee. Want vir hom het syne veelvuldig teruggekom en gaan hy nou ook die geleentheid kry om vir sy kinders se opvoeding eendag te kan betaal.

Hy het nooit verwag om Monet of sy R100 weer te sien nie. Hy het gegee sonder om terug te verwag.

Hoe pas hierdie alles by ons tema van #Oorlog en vandag se teksvers in? Gaan lees die hele hoofstuk 10. Dit begin waar Jesus 72 mense twee-twee uitstuur om Sy Boodskap in ‘n ongenadige wêreld te verkondig, dan lees ons van die barmhartige Samaritaan en eindig met Maria wat – tot groot ontsteltenis van haar suster Marta aan Jesus se voete sit en na Hom luister.

Dit is presies waar ons die #oorlog gaan wen: aan Sy voete, deur barmhartigheid, medelye en opregte liefde aan ons naaste te bewys en deur uit te gaan en Sy Woord aan die wêreld te verkondig. Soos ‘n R100 wat reeds harte regoor die land aangeraak het en vir die jare wat kom gaan vermenigvuldig om ook die volgende generasie hoop te kan gee.

Alles wat mooi is!

Groetnis

Hierdie lied inspireer my.

G E M E E N S K A P S N U U S
D I N S D A G   1 1   J U N I E   2 0 1 9

W E R K V E R S K A F F I N G
D I N S D A G   1 1   J U N I E    2 0 1 9

Die Werkverskaffingsbulletin word elke Dinsdag om 10h40 uitgesaai op 104fm.

Poste moet asseblief teen Maandae 11:00 gestuur word na reception@104fm.co.za

EFFESIERS 6:11:  #Oorlog

“Trek die volle wapenrusting van God aan, sodat julle staande kan bly teen die liste van die duiwel.” (1933/53-vertaling)

11 Junie 2019_RVR

Vir langer as ‘n jaar gesels die Here met my oor Sy wapenrusting. Kort nadat ek in 2017 by my vorige werk weg is, het ‘n boek van Priscilla Shirer, Die wapenrusting van God, my oog in ‘n boekwinkel gevang. Dis nie die tipe boek wat ek gewoonlik koop nie, maar ek het. Vir lank lê die die boek op my boekrak tot Februarie vanjaar toe ek en my man besluit het ek word voltyds Mamma.

Intussen het my jongste begin om by sy voorskoolse groep oor die wapenrusting van God te leer en raak dit, so wanneer ek onthou, deel van my gebedslewe. Die lesse wat die Here vir my vanuit die boek leer maak my deeglik bewus, dat as ouer, ek elke dag die volle wapenrusting MOET aantrek, nie net vir myself nie, maar ook vir my man, kinders en my familie.

Want sien, hoewel ons beslis nie die duiwel agter elke boom en bos wil sien nie, is hy eintlik  daar. Moet ons in vrees lewe? Beslis nie! Ons moet wel bewus wees van hom.

In haar boek skryf Priscilla: “Satan is slu, maar hy is nie baie oorspronklik of besonders kreatief nie. Hy het altyd dieselfde basiese plan.”

Die wapenrusting is God se baie noodsaaklike toerusting aan jou en my om ons nie net te beskerm nie, maar om ons bewus te maak van wat om ons aangaan. Om ons paraat te maak en voor te berei vir ‘n geveg waaraan ons soms, nie eers weet ons deelneem nie

Die goeie nuus is dat Jesus weet, en Hy is so lief vir my en jou dat Hy in Sy groot genade gaan aanhou om jou te herinner aan dit wat noodsaaklik is vir jou.

Lees vandag EFFESIERS 6: 10 – 19. Plak ‘n nota op jou yskas, trek ‘n streep by jou voordeur of hang ‘n soldaatteken aan jou sleutel. Maar maak seker dat vanaf vandag jy elke dag al jou geestelike klere aanhet voor jy die huis verlaat.

Alles wat mooi is!

Groetnis

Hierdie lied inspireer my.

Deur Eunice Stoltz

“Ek het jou op jou naam geroep, jy is Myne.” – Jesaja 43:1

Michael W. Smith se pa het die gewoonte gehad om wanneer hy iets wou sê, hy aandag getrek deur te roep: “Hold the phone. Hold…the phone!”

Tydens sy 2019 Suid-Afrikaanse Toer het Michael nie geskroom om te vertel watter besonderse band daar tussen hom en sy ouers was nie. Michael is in die meer landelike gebied, Nashville, in Amerika woonagtig. Hy vertel dat hy soms in ‘n winkelsentrum mense sal kry wat vra of hy Michael W. Smith is, waarop hy ja antwoord en dan moet hoor: “O, we love your parents.”

Sowat twee jaar gelede ontvang Michael ‘n oproep wat sê sy pa is ernstig siek. Binne ‘n paar minute was hy by sy ouerhuis waar sy pa besig was om deur paramedici op ‘n draagbaar gelaai te word. Buite in die straat het bure en vriende nader gestaan. Terwyl hy ‘n paar mense buite groet hoor hulle ‘n geroep vanuit die ambulans: “Hold the phone. Hold…the phone!” Michael se pa het half sittende wyse regop gekom, na Michael gewys en geroep: “That’s my son. His Michael W. Smith!”

Michael vertel hoe hy die Here daardie aand hoor fluister het: “I am your Father, and you are my son.”

Mag ons lofprysing die afgelope week tydens die Michael W. Smith Toer oorspoel in ons lewens hiervandaan vorentoe. Mag ons die Here voortdurend loof en prys en hoor hoe Hy opnuut vir elkeen sê: Ek is jou Vader, en jy is my kind.

PSALM 18: 40:  #Oorlog

“En U het my met krag omgord vir die stryd; U het my teëstanders onder my laat buk.” (1933/53-vertaling)

10 Junie 2019_RVR

Ons tema hierdie week is #Oorlog.  Beslis nie ‘n woord wat jou hart warm laat klop nie! Dit maak eerder ‘n negatiewe gevoel in ons wakker: een van onsekerheid, vrees, angs of dalk is dit ‘n gedagte wat ons eenvoudig nie aan wil dink nie.

Maar die oorlog is werklik. En as kind van God, is jy elke dag in ‘n baie werklike geestelike oorlog betrokke. Dit is ongelukkig een wat ons soms verkies om diep in ons hartkamers weg te bêre, te ignoreer en nie aan te dink nie. As ons die wind nie kan sien nie, beteken dit nie hy waai nie! Dit is net so met ons vyand.  Ons kan hom dalk nie sien nie, maar ons moenie dink hy is nie daar en besig met ‘n baie spesifieke plan om my en jou aan te val nie. Sy oorlogstrategie vir elkeen van ons is anders. Hierdie onsigbare vyand is ‘n werklikheid en sy handewerk lê soms soos stukkende glas (lees drome, geleenthede, verhoudings, lewens) agter ons.

Gelukkig is ons reeds meer as oorwinnaars verseker Romeine 8:37 ons. As kinders van God het ons toegang tot ‘n skatkis van God se beskerming. Gebruik ons dit? Trek jy daagliks jou wapenrusting aan wat Jesus in Efesiërs 6:10 –19 vir jou gee of dink jy dit is net nog ‘n rympie wat jy soms kan lees as jou dagstukkieboek toevallig daarop land?

Liewe vriende, ons moet erns maak met God se Woord. Ons kan nie aan die slaap gevang word of naïef wees nie. Ons moet voorbereid wees en nie bang nie, want ons Koning het reeds die oorwinning behaal. Die duiwel is reeds verslaan. En hy weet dit.

Maak hierdie week seker dat jy jou wapenrusting ernstig opneem. Memoriseer dit. Leer dit vir jou kinders en kleinkinders. Moenie jou kamer verlaat sonder dat jy volledig aangetrek is nie.

Môre gesels ons verder oor die #Wapenrusting en hoe dit jou gaan voorberei om in volle oorgawe te kan lewe aangesien Hy jou met krag omgord het vir die stryd waarin Hy reeds jou vyande verslaan het!

Hoe heerlik is dit nie? Om reeds in die wenspan te wees!

Alles wat mooi is,

Groetnis

HIERDIE LIED INSPIREER MY