Month: February 2020

Gebed van Salomo

“Luister tog uit die hemel en vergeef u dienaars en u volk Israel se sonde en gee reën op u land wat U aan u volk as besitting gegee het” (1 Konings 8:36)

Salomo en sy mense het sewe jaar aan die tempel gebou. Nadat dit klaar was, het Salomo voor al die mense gaan staan en ’n gebed tot God gerig. Hy het God geloof en geprys omdat die Here so goed vir die Israeliete gesorg het. Ook het hy gevra dat God in die toekoms vir hulle moet sorg. In ons teksvers vra hy dat God hulle sondes moet vergewe en as dit droog is, dat God reën moet stuur.

So baie keer is daar in ons land ook droogtes. Dan kry almal swaar. Sulke tye kan ons tot God bid vir reën. Maar dan moet ons ook vergiffenis vir ons sonde vra en weer terugdraai na die Here toe. Die Here wil graag ons sondes vergewe en vir ons as sy kinders help. By God is niks onmoontlik nie, Hy sal ons altyd help as ons in nood is.

Almagtige Here, dankie dat U alles kan doen. Help my om altyd tot U te bid as ek in die nood is. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Die Tempel

“Ek sal tussen die Israeliete woon, Ek sal my volk Israel nie verlaat nie” (1 Konings 6:13)

Baie jare nadat die Israeliete in hulle beloofde land aangekom het, het die Here vir koning Salomo toegelaat om vir die Here ’n tempel te bou. Die Here het vir hom presies gesê hoe die tempel moes lyk. Hy het dit laat bou sodat die mense daar tot God kan bid en offers bring. Die tempel moes nie net ’n huis van gebed vir die Israeliete wees nie, maar vir al die volke. Alle mense moes welkom wees om daar te aanbid.

Omdat Salomo ’n baie ryk man was, het hy ’n baie mooi tempel gebou. In 1 Konings 6 word beskryf hoe die tempel gebou is. Daar is baie hout en goud gebruik vir die bou van die tempel. Die tempel was die plek waar God op ’n spesiale manier by sy volk was.

Alhoewel ons nie meer ’n tempel het nie, het ons kerkgeboue waar ons kan gaan aanbid en van God se Woord kan hoor. As ons gereeld saam met die gemeente gaan om Hom te loof en prys, sal God ons ook seën. As God ons seën, beteken dit dat Hy net die beste vir ons wil gee. Soos God in vers 13 belowe het dat Hy die Israeliete nooit sal verlaat nie, so woon God ook by ons.

Liefdevolle Here, help my om gereeld saam met u gemeente te aanbid, sodat ek daar meer van U kan leer. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

A L L E S   E N   N O G   W A T

S A T E R D A G   0 8  F E B R U A R I E  2 0 2 0

K E R K N U U S
S O N D A G   0 9  F E B R U A R I E  2 0 2 0

Salomo se wysheid

“Die hele Israel het gehoor van die uitspraak wat die koning gelewer het, en hulle het hoë agting vir die koning gekry, want dit het vir hulle duidelik geword dat hy van God self wysheid ontvang het”

(1 Konings 3:28)

Eenkeer het twee vroue na Salomo gekom met ’n probleem. Hulle het saam in ’n huis gewoon, en elkeen het ’n baba gehad. Een nag is die een vrou se baba dood. Sy ruil toe haar baba om met die ander vrou se baba wat nog lewe. So het hulle voor Salomo gestaan en stry oor wie se baba dit is wat nog lewe.

Salomo beveel toe dat die baba wat nog lewe in twee gesny moet word en vir elke vrou ’n helfte gegee moet word. Toe het die regte ma van die baba gesoebat dat hulle dit nie moet doen nie, maar liewer die baba vir die ander vrou moet gee. Dit was duidelik wie die regte ma was. So het Salomo sy wysheid, wat hy van God ontvang het, gebruik om regverdig op te tree.

As ons ook vir God om wysheid vra, sal Hy ons help om ook in ons lewe teenoor ander regverdig op te tree.

Here, gee asseblief elke dag vir my die wysheid sodat ek ook soos Salomo regverdig kan optree. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Wanneer die manne van MercyMe jou hartsnare roer en behoorlik warm laat klop, en geskenk-idees vir Valentynsdag jou moedeloos laat, het 104Concerts net die antwoord!

As jy die JOHANNESBURG-vertoning van hierdie internasionaal bekroonde groep wil gaan beleef, kan jy vir ‘n kort tydperk (net tot een minuut voor middernag op 14 Februarie!) van die Koop-een-Kry-een aanbof op iTickets gebruik maak.

Steel haar hart, maak sy dag of bederf jouself met die heerlike geskenk!

Vir meer (of as jy ‘n Kapenaar is en reeds elke dag bederf word), klik hier:♥

Mawees is pret… maar kan jou soms met hande in die hare laat… Op Vrydag, 7 Februarie om 10:00 begin ’n splinternuwe interaktiewe program tydens Brunch met Benescke, Mammas 101. Tydens dié pretprogram met Benescke Janse van Rensburg en Rouchelle Liedeman as aanbieders, gaan hulle elke week oor interessante temas gesels en interessante gaste nader trek om hul kennis, glipse, hoogtepunte en leer-oomblikke met jou te deel!

Die lekkerste is dat jy as luisteraar heerlik kan saamgesels op die WhatsApplyn en so verseker dat al jou Mamma-vrae beantwoord word. Trek dus ’n groot rooi sirkel om Vrydag, 7 Februarie om 10:00 en maak seker jy vertel vir al jou mamma-vriendinne om vir die volgende paar weke ook in te skakel.

Mammas 101 net hier op Radio Tygerberg. Ons leef Christus.

WEEK 1: HOE HET MA-WORD JOU LEWE VERANDER?

Mammas 101 is afgeskop met Radio Tygerberg se Rosebud Tshobane en Veldskoen se Anna Greenfield en klein Charlotte Dean.

Gehoorsaam aan God

“Gee my die gehoorsaamheid aan U dat ek u volk reg sal regeer en in alles insig sal hê”

(1 Konings 3:9)

Nadat Salomo koning geword het, het hy in Gibeon vir die Here ’n offer gebring. Ons lees dat hy duisend diere vir die Here geoffer het, omdat God hom so geseën het.

Daar in Gibeon het die Here een nag in ’n droom aan hom verskyn. God het hom gevra wat hy graag wil hê. Salomo vra toe dat God vir hom gehoorsaamheid sal gee, en insig, soos ons in die teksvers lees. Omdat Salomo nie rykdom of eer gevra het nie, het God hom sy lewe lank geseën en baie meer gegee as wat hy gevra het.

So moet ons ook wees. Vra vir die Here gehoorsaamheid. Gehoorsaamheid aan die Here gee ware wysheid. En dan sal die Here ook al die ander dinge wat ons nodig het, vir ons gee.

Dierbare Vader, gee vir my gehoorsaamheid aan U. Dankie vir al die mooi dinge wat ek so onverdiend van U ontvang. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Salomo

“Hou jou aan wat die Here jou God jou voorskryf en lewe daarvolgens” (1 Konings 2:3)

Toe Dawid oud geword het en naby sy einde was, het hy besluit dat sy seun Salomo die volgende koning moes word. Dawid het vir Salomo laat kom en hom beveel om God te gehoorsaam, dan sal hy voorspoedig wees in alles wat hy doen.

Wat ’n mooi boodskap is dit nie! Dis sekerlik die belangrikste ding wat ’n pa vir sy seun kan sê voor hy sterf. Ons ken die geskiedenis van Salomo. Hy was ’n baie wyse man. Hy was baie voorspoedig. Die Here was goed vir hom omdat hy gehoorsaam was.

Ons gee ook baie keer vir ons kinders raad. As ons hulle so ’n boodskap gee soos Dawid aan Salomo gegee het, dan gee ons vir ons kinders iets kosbaars. Dan ontvang hulle deur ons die Here se seën.

Here, gee my die wysheid om ook vir my kinders te lei om U te gehoorsaam. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

W E R K V E R S K A F F I N G
D I N S D A G  0 4  F E B R U A R I E  2 0 2 0

Die Werkverskaffingsbulletin word elke Dinsdag om 10h40 uitgesaai op 104fm.

Poste moet asseblief teen Maandae 11:00 gestuur word na reception@104fm.co.za

Radio Tygerberg 104fm bied ’n gratis platform vir werkgewers om beskikbare poste te adverteer. Ons probeer so ver moontlik verseker dat die werksgeleenthede wat geadverteer word, betroubare inligting deurgee.Neem kennis dat Radio Tygerberg 104fm nie verantwoordelikheid aanvaar vir enige skakeling, onderhandelings of enige ander legitieme sake tussen betrokke partye wat mag voortspruit op hierdie platform nie.