W E R K V E R S K A F F I N G

D I N S D A G   1 0  M A A R T   2 0 2 0

Die Werkverskaffingsbulletin word elke Dinsdag om 10h40 uitgesaai op 104fm.

Poste moet asseblief teen Maandae 11:00 gestuur word na reception@104fm.co.za.

Bid vir ons land

“Die Here sal voorspoed skenk en ons land sal sy oes gee” (Psalm 85:13)

In hierdie Psalm word die Here geprys omdat Hy goed was vir die mense van Israel. Hy het vir hulle ’n land gegee om in te woon. Hy het hulle sonde vergewe. God het weer vir hulle ’n toekoms gegee. Hyself was by hulle.

Maar die Psalm is ook ’n gebed: die Here moet hulle tog help om gehoorsaam te lewe. Hy moet hulle help om Hom alleen te vertrou en Hom alleen te dien. Want dan sal Hy aanhou sorg, Hy sal vrede en geregtigheid gee, Hy sal voorspoed en genoeg kos gee.

Ons werk is om genoeg kos te help maak vir al die mense van ons land. Soms kom daar droogte of oorstroming of rampe. Dan is daar nie genoeg kos nie. Daarom moet ons nie net hard werk nie, ons moet ook op die Here vertrou. Wanneer ons goeie oeste maak, is dit net genade van God. Hy gee alles en sorg vir ons.

Wanneer ons na ’n dag se werk tot God bid, moet ons die Here vra dat Hy ons land sal seën, sodat almal iets sal hê om te eet. En dat daar vrede sal wees.

Here, gee dat die natuur daar buite vir ons goed mag wees, en dat ons dankbaar sal wees vir kos om te eet. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Gaan kerk toe

“Waarlik, één dag in u tempel is beter as duisend daarbuite” (Psalm 84:11)

Die skrywer van hierdie Psalm sê dat dit vir hom lekker
is om in die tempel van God te wees. Want in die tempel
is God self teenwoordig. Daar ontmoet hy God. Daar
hoor hy God se Woord. Daar hoor God ons gebede en liedere. Hy voel tuis en veilig. Selfs die mossie en swaeltjie, wat hul nessies maak onder die dak van die tempel, voel daar veilig.

Die Here het Sondae vir ons gegee om rustig te wees. Om saam met ander gelowiges kerk toe gaan en saam na die Woord van God te luister en meer te leer van God: hoe lief Hy ons het, hoe mooi Hy vir ons sorg, en hoe Hy ons sonde vergewe. Ons bid en sing saam tot God, gee ons dankoffers en word versterk.

As jy deur ’n dorre, dors wêreld moet trek en jy ontdek skielik ’n fontein met helder, koel water, so is dit om kerk toe te gaan. Dis soos die vroeë reën na ’n droogte. Keer op keer kry mens daar nuwe krag.

Besluit sommer nou om Sondag kerk toe te gaan, om God daar te aanbid. Die ontmoeting sal so wonderlik wees; jy sal nie anders as om God te loof nie.

Heilige Gees, gee asseblief vir my die begeerte in my hart om Sondae saam met die gemeente kerk toe te gaan. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Vertel aan ander

“…sodat die volgende geslag dit sal weet, en die kinders wat nog gebore sal word, dit weer aan hulle kinders kan vertel” (Psalm 78:6)

Een van die maniere om God se Woord op aarde te versprei, is om dit aan ander mense oor te vertel. Die grootste rede vir ons bestaan is om mee te werk dat God se liefde aan ander bekend sal word. God wil hê ons moet sy dissipels wees om so sy Naam op aarde groot te maak.

Hierdie Psalm wys daarop dat elke geslag die kennis omtrent die groot werke van God aan die volgende moet oordra. Dan sal daardie kinders dit weer aan hulle kinders vertel.

As jy kinders het, vertel hulle van God. Vertel van Jesus wat gesterf het aan die kruis, en vir al ons sonde betaal het. Vertel ook dat die ewige lewe gegee word aan almal wat glo dat Jesus ons Verlosser is.

Heilige Gees, leer en help my om my kinders van U te vertel. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Die Here hoor altyd

“In die aand, in die môre en in die middag, heeldag kla en sug ek, en Hy hoor my roep”

(Psalm 55:18)

In hierdie Psalm skryf Dawid dat hy baie ontsteld is. Hy het baie vyande wat hom wil doodmaak. Nou smeek hy God om hom te help, want hy is baie bang. Hy besef dat hy enige tyd na God kan roep. Dit maak nie saak of dit in die dag of nag is nie, in die oggend of aand nie. God hoor altyd as hy roep.

Ons kan ook soos Dawid enige tyd na God roep as ons hulp nodig het. Of ons by die werk is, of by vriende, of selfs in die middel van die nag, ons kan tot die Here bid. Hy is nooit te besig om ons hulpgeroep te hoor nie. Ons beste vriende laat ons partykeer in die steek, maar God het altyd tyd vir ons.

Moenie bang wees om enige tyd na God te roep nie. Vertrou dat Hy sal hoor.

Here, dankie dat U elke sekonde van my lewe tyd het vir my. Amen.

K E R K N U U S
S O N D A G   0 8  M A A R T   2 0 2 0

A L L E S   E N   N O G   W A T

S A T E R D A G   0 7  M A A R T   2 0 2 0

Vra om vergifnis

“Neem tog my sonde weg dat ek rein kan wees, was my dat ek witter as sneeu kan wees” (Psalm 51:9)

Ons lees in die Bybel dat Dawid God gedien het. Hy was ’n kind van die Here, maar tog het hy ook gesondig. Ons het al tevore gekyk na een groot sonde wat hy gedoen het, toe hy Uria laat doodmaak het om sy vrou Batseba te vat.

Alhoewel Dawid gesondig het, het hy berou daaroor gehad en vir God gevra om hom te vergewe. In Psalm 51 smeek hy God om hom te vergewe en hom ’n nuwe mens te maak. Hy besef dat hy verkeerd gedoen het en vra dat God hom weer blydskap en vreugde moet gee.

Elke mens op aarde doen een of ander tyd sonde. Niemand is volmaak nie; net God alleen is sonder sonde. As jy sondig, gaan na God, sê jy is jammer en vra dat Hy jou moet vergewe. Die Here sal jou vergewe en jou weer ’n nuwe, skoon hart gee.

Wonderlike Here, vergewe asseblief my sonde, en was my witter as sneeu. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Rykdom

“Moet jou nie daaroor kwel dat mense ryk word nie” (Psalm 49:17)

Daar is baie ryk mense in die wêreld. Hulle het baie besittings, baie geld in die bank, groot en mooi huise, duur motors en pragtige klere. Soms voel ons wat nie soveel het nie ’n bietjie jaloers en ons kwel ons daaroor. Ons wens baie keer om meer te hê.

Nou lees ons in Psalm 49 dat ryk en arm mense gelyk is voor God. Ons moet almal eendag doodgaan; dan kan ons niks saamneem nie. Dan tel ryk of arm niks meer nie. Aardse besittings is nie so belangrik nie. Jesus het gesê dat ons liewer vir ons skatte in die hemel bymekaar moet maak.

Al het ons min, maar ons het God in ons harte, is ons baie ryk. Want dan kan ons op Hom vertrou, Hy sal sorg.

Here, dankie vir wat ek besit. Dankie dat ek die grootste rykdom het – vir U. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Sing vir God

“God is Koning oor die hele aarde; sing vir Hom ’n lied” (Psalm 47:8)

Die Bybel leer ons hoe om God te dien. Daar is baie maniere. Ons kan God dien deur te bid, deur Bybel te lees en kerk toe te gaan. Ons dien God ook deur gehoorsaam aan sy Woord te lewe en te doen wat Hy in sy Tien Gebooie van ons vra. Maar ons kan God ook dien deur te sing. En dis tog ’n lekker manier; ons hou mos van sing.

In hierdie Psalm word ons gevra om vir die Here te sing. Om saam lofliedere vir Hom te sing. Deur vir God te sing, erken ons dat Hy Koning is oor die hele aarde, dat Hy groot en goed is. Ons bewys ook ons respek aan God as ons tot sy eer sing.

Wanneer jy weer kerk toe gaan en daar word gesing, sing dan tot sy eer. Let op die woorde wat gesing word, en so kan jy God dien en prys. As ons liedere vir God sing, maak dit God se hart bly. Maar dit maak ook ons eie hart vol blydskap. Om lekker te sing, gee vir ons die vreugde en vrede van God

Dankie Here dat U vir my ’n stem gegee het. Help my om U te dien wanneer ek sing. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.