Author: Karien

Kinders van God

“Almal wat hulle deur die Gees van God laat lei,

is kinders van God” (Romeine 8:14)

Elke kind wil graag trots wees op sy ouers. By die skool spog kinders oor hoe goed hulle pa of ma is. Seuntjies vertel graag aan hulle maats wat hulle pa kan doen. Veral as ’n pa ’n rugbyspeler was, vertel hulle graag hoe ’n goeie speler hy is. Ook die dogtertjies spog dat hulle ma mooi klere kan maak en lekker koek kan bak. Dit is goed om in vandag se tye te hoor dat kinders nog trots is op hulle ouers.

Ek en jy kan ook baie trots wees om so ’n goeie Vader in die hemel te hê. Om ’n kind van God te wees, is ’n groot voorreg. Nie almal kan sê dat hulle kinders van God is nie. Dis net God se groot genade en liefde wat ons sy kinders maak. Daarom moet ons ons deur sy Gees laat lei en sy wil doen.

My Vader in die hemel, dankie dat U my aangeneem het as u kind. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Doen

“Nie dié wat die wet hoor, word deur God vrygespreek nie, maar dié wat doen wat die wet sê, sal vrygespreek word” (Romeine 2:13)

Elke mens wil graag weet wat hy of sy mag doen en wat nie gedoen mag word nie. Ons ken die Tien Gebooie wat God aan die Israeliete gegee het. Daarmee wil God vir elke mens sê hoe Hy wil hê ons moet leef. As jy ’n tydjie het, gaan lees gerus weer Eksodus 20 of Deuteronomium 5. Jesus het natuurlik ook in Matteus 22 die wil van God opgesom in die wet van die liefde. As ons daardie wet van God nakom, en doen wat Hy vra, dan leef ons soos God se kinders.

In ons teksvers sê Paulus dat ons nie net van die wet moet hoor nie, ons moet ook doen wat die wet sê. Daar is baie mense wat weet waar die wet in die Bybel staan, en hulle weet ook wat daar geskrywe staan, maar hulle lewe nie volgens God se Wet nie. Ek en jy moet besef dat ons God se gebooie moet gehoorsaam, want ons is sy kinders.

Here, dit is my so moeilik om u wet te gehoorsaam. Vergewe my en help my om ’n beter kind vir U te wees. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

God oordeel regverdig

“Ons weet dat God regverdig handel wanneer Hy mense wat sulke dinge doen, veroordeel”(Romeine 2:2)

Een van ons mense se swakste eienskappe is seker om ander te veroordeel. Dit is vir ons so lekker om ander se foute raak te sien, en hulle dan te kritiseer. Ons voel amper goed as ander mense verkeerde dinge doen, sodat ons dit kan veroordeel, so asof ons sonder sonde is.

Ek en jy wat kinders van die Here is, weet dat ons almal vol sonde is. Daarom kan ons niemand oordeel nie, net God alleen kan oordeel. Ons weet wanneer ons verkeerd doen, en dan kan ons net die Here vra om ons te vergewe.

In ons teksvers skryf Paulus aan die Romeine dat God regverdig sal oordeel oor mense wat verkeerd optree. Uit hierdie gedeelte moet ons leer om vir die Here te vra om ons sondes te vergewe. Doen ons dit nie, kan God ons nie vergewe nie. Hy wil hê ons moet vergifnis vra, sodat ons vrygespreek kan word.

Here Jesus, help my om elke dag my sonde voor U te bely. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Help mekaar

“Ek bedoel dat, as ek by julle is, ons deur mekaar se geloof bemoedig kan word, ek deur julle s’n en julle deur myne” (Romeine 1:12)

Omdat Paulus so graag die boodskap van God aan alle mense wou verkondig, het hy ’n hele aantal briewe geskryf. Hierdie brief, Romeine, skryf hy aan die gelowiges wat in Rome bly. Hy wil hulle graag besoek, sodat hulle mekaar kan help om hul geloof te versterk.

Ons almal weet dat as ’n groot werk gedoen moet word, dit soveel makliker is as almal saam werk. Wanneer jy ’n groot klip moet optel, kry jy dit miskien nie reg nie, maar as jou maat help, is dit soveel makliker.

So wil die Here ook hê dat ons as gelowiges moet saamstaan en mekaar help. Dan kan God se boodskap soveel makliker die wêreld ingedra word. Probeer help waar jy kan, sodat jou geloof versterk kan word, en dat Here se Woord ook deur ander verstaan kan word.

Dankie, Here, dat daar so baie mense is wat u Woord verkondig. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

’n Geskenk van God

“Ons swaarkry in hierdie lewe is maar gering en gaan verby, maar dit loop vir ons uit op ’n heerlikheid wat alles verreweg oortref en wat ewig bly”

(2 Korintiërs 4:17)

Om ’n mens te wees, is nie altyd maklik nie. Van geboorte af tot volwassenheid is daar maar altyd swaarkry en probleme. Daar is baie soorte siektes en ongelukke wat ’n mens tref. Ook wanneer ons groot is, moet ons hard werk om aan die lewe te bly. Dit is soms baie warm of baie koud, maar ons moet uithou om te kan oorleef.

Ons teksvers sê dat hierdie swaarkry nie vir altyd sal wees nie. As ons volgens God se wil lewe, sal ons eendag die heerlikheid in die hemel ontvang. Ons menslike verstand is te klein om te verstaan wat God in die hemel vir ons sal gee, maar ons kan weet dat die hemel vol vrede en vreugde sal wees. Dit sal ook vir ewig en vir altyd wees. Wat ’n wonderlike vooruitsig!

Wonderlike Here, help my om my oë te hou op die  heerlikheid van die toekoms. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Paulus in Rome

“Hy het die koninkryk van God verkondig en die mense alles oor

die Here Jesus Christus geleer”(Handelinge 28:31)

Paulus was ’n besonderse mens. Hy was so vol van die Heilige Gees dat hy God se Woord aan soveel mense moontlik wou verkondig. In Handelinge lees ons van die baie dorpe en streke waar hy die mense van Jesus vertel het. Dit was nie altyd vir hom maklik nie, maar God was by hom om hom moed te gee. Baie mense was teen hom, maar die Here het self gesorg dat al meer mense hul bekeer het. So het God se kerk van dag tot dag gegroei.

Nadat Paulus baie reise onderneem het, is hy in Jerusalem deur die Jode aange­kla en het hy uiteindelik as ’n gevangene in Rome beland. Daar het hy ook die mense van Jesus vertel.

Omdat hierdie ou wêreld van ons so vol sonde en verkeerde dinge is, moet ons bid dat die Heilige Gees mense se harte sal verander. Wanneer mense deur God veran­der word, sal ons vrede en liefde op aarde hê.

Here, ek bid vir die mense wat nog nie U aangeneem het nie. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

As God wil

“Hy het van hulle afskeid geneem en gesê: ‘As God wil,

kom ek na julle toe terug’ ” (Handelinge 18:21)

Terwyl Paulus in Efese was, het hy besluit om na ander dorpe ook te gaan. Omdat die mense so baie van God se woord gehou het, wou hulle gehad het dat Paulus langer moes bly. Hy wou egter verder gaan, en het gesê dat as dit God se wil is, hy weer na hulle sou terugkom.

Elke dag neem ons besluite oor wat ons gaan doen, of waarheen ons wil gaan. Ons lewe is in God se hande, en Hy alleen weet wat die beste is vir ons. Daarom moet ons altyd verstaan dat die mens planne kan maak, maar ons planne is afhanklik van God. Ons moet vir die Here vra wat sy wil vir ons is, voor ons ’n besluit neem. Wanneer ons vir Hom vra wat die beste sal wees, sal Hy ons die regte pad laat loop.

Dierbare Here, ek gee my lewe oor in u hande. Help my om altyd u wil te doen. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Die Here stap saam

“Een nag het die Here in ’n gesig vir Paulus gesê: ‘Moenie bang wees nie, hou aan met preek en moenie stilbly nie, want Ek is by jou’ ”  (Handelinge 18:9)

Omdat daar in Paulus se tyd nog so min mense van Jesus gehoor het, het hy baie dorpe en streke besoek. Die Bybel vertel van Paulus se sendingreise. Paulus was so ywerig dat hy enigiets verduur het net om God se boodskap te verkondig. Hy is in die tronk gegooi, geslaan en verneder, maar nogtans het hy aangehou met preek. Die Here self het hom moed ingepraat soos ons teksvers sê.

Soos Paulus die Woord van God versprei het, so moet ek en jy ook nie bang wees om vir God te werk nie. As ons die behoefte het om ander van Jesus te vertel, kan ons op die Here vertrou, want Hy is altyd by ons. Ons het dikwels die geleentheid om te getuig, dan moet ons nie bang wees nie, deur sy Heilige gees is Hy naby ons, binne-in ons.

Vader in die Hemel, gee vir my die vrymoedigheid om vir U te getuig en te werk. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

So maklik

“Hulle antwoord hom: ‘Glo in die Here Jesus, en jy sal gered word,

jy en jou huisgesin’ ” (Handelinge 16:31)

Paulus en Silas het saam baie plekke besoek en God se woord verkondig. Toe hulle in Filippi kom, het hulle ’n vrou teëgekom waarin daar ’n bose gees was. Sy was ’n waar­sêer wat vir haar eienaars baie geld daarmee verdien het. Toe Paulus die gees uit haar uitgedryf het, kon sy nie meer geld maak vir haar eienaars nie. Hulle was baie kwaad, en Paulus en Silas is toe daaroor in die tronk gegooi.

Terwyl hulle een nag in die tronk was, het hulle lofliedere tot God gesing. Daar het ’n groot aardbewing gekom wat die tronk se deure laat oopgaan het. Die bewaarder wou homself doodmaak omdat hy gedink het dat die gevangenes ontsnap het. Paulus het hom gekeer. Toe wou die bewaarder weet wat hy moet doen om gered te word. Ons teksvers is die antwoord.

Baie mense dink dis moeilik om gered te word, maar eintlik moet ons net vertrou op die Here Jesus. Dit is so maklik.

Here Jesus, help my om net te in U te glo. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.

Sendingwerk

“So is die gemeentes in die geloof versterk, en die getal

gelowiges het by die dag groter geword”  (Handelinge 16:5)

Ons hoor en lees baie van sendingwerk. Baie gemeentes samel geld in vir sendingwerk, en mense gaan na ver lande om sendingwerk te doen. Wat beteken dit? Sending is om God se Woord aan mense te bring wat dit nog nie aanvaar het nie.

Ons lees in Handelinge dat Paulus baie gereis het om die evangelie te gaan verkondig. Dit was nie maklik nie, maar deur sy ywer vir die Here het baie mense God se boodskap aanvaar.

Vandag word daar ook nog baie sendingwerk gedoen. Mense gaan na lande en plekke waar niemand nog van Jesus gehoor het nie. Die sendingwerkers kry baie swaar en het soms min kos en klere om te oorleef. Kom ons bid elke dag vir hulle sodat God se woord aan alle mense verkondig kan word.

Here, help vir my om te gee en te bid vir sendingwerk. Amen.

Dagstukkies Met… is ‘n Radio Tygerberg 104FM-inisiatief en word moontlik gemaak deur CLF, die Christelike Lektuurfonds.